མཁན་ཆེན་ཚུལ་ཁྲིམས་བློ་གྲོས་ཀྱི་གསུང་རྩོམ།

དང་པོ། དམ་པའི་ལྷ་ཆོས་དང་མི་མཐུན་པས་སྤང་དགོས་པ། བློ་གསར་ཡིད་ཀྱི་དགའ་སྟོན་ལས། “དང་པོ་ཆས་གོས་ཀྱི་ཐད། སྤྱིར་རང་རེའི་གོས་དང་རྒྱན་འདི་བོད་གངས་ཅན་གྱི་མི་ཡིན་པའི་མཚོན་བྱེད་ཡིན། བོད་ཡུལ་གྱི་དྲོ་གྲང་དང་མཚམས་ཤིང་མཛེས་ཉམས་ཀྱང་མི་དམན་པ་ཡོད་ལ་སྟབས་ཀྱང་བདེ་བའི་དུས་རབས་གསར་བའི་སྐབས་ཀྱི་སྤྱོད་ལམ་དང་མི་འཚམས་པ་གང་ཡང་མེད།དེས་ན་བོད་མི་ཐམས་ཅད་ཀྱིས་ཡུལ་དུས་དང་འཚམ་པའི་བོད་གོས་གཙང་མ་གྱོན་རྒྱུ་ནི་ ཅིས་ཀྱང་གལ་ཆེའོ། འོན་ཀྱང་དེང་སང་བོད་ཀྱི་གོས་དག་ལ་ཆོས་དང་འཇིག་རྟེན་གྱི་ལུགས་གཉིས་ཀ་དང་མི་ འཚམས་པའི་སྐྱོན་འགའ་ཡང་མཐོང་སྟེ། གང་ཞེ་ན། གོས་ཀྱི་མཐའ་ནས་སྟག་དང་གཟིག་དང་སྲམ་གྱི་པགས་པས་གོས་རང་ཆེར་མི་མཐོང་བ་ཙམ་དུ་གཡོགས་ཏེ་མཛེས་ཆོས་བྱེད། འདི་ནི་རང་རེའི་མིག་ལམ་ལ་མཛེས་པ་ཙམ་དུ་ཟད་ཀྱི། མི་རིགས་གཞན་རྣམས་ཀྱི་མིག་ལམ་དུ་མི་མཛེས་པར་མ་ཟད་ཆེས་ཤིན་ཏུ་གདུག་པའི་སྤྱོད་པ་ཞིག་ལ་བརྩི་བར་གོར་མ་ཆགས་ལ། དོན་དངོས་ཀྱི་ཐོག་ནས་ཀྱང་ཆོས་དང་འཇིག་རྟེན་གཉིས་ཀ་དང་འགལ་བ་ཞིག་སྟེ། དམ་པའི་ཆོས་ཕྱོགས་ནས་བཤད་ན། ལྟོ་འགྲང་དང་རྒྱབ་དྲོ་གང་ལའང་མི་ཕན་པར་ཤེས་བཞིན་དུ་སེམས་ཅན་རབ་ཏུ་མང་པོའི་སྲོག་རང་གིས་གཅོད་པའམ། གཞན་ལ་གཅོད་དུ་བཅུག་ནས་དེ་རྣམས་ཀྱི་པགས་པས་དགོས་མེད་དུ་རང་གི་ལུས་བརྒྱན་ནས་མཛེས་པར་རློམ་པ་ནི་སེམས་ཅན་ཐམས་ཅད་ལ་བུ་གཅིག་པུའི་མ་ལྟར་བྱམས་དང་བརྩེ་བ་རྩལ་དུ་འདོན་པའི་ཐེག་པ་ཆེན་པོའི་ཆོས་དང་ཤིན་ཏུ་འགལ་བས་བླུན་ཅིང་གདུག་པའི་སྡིག་སྤྱོད་ཅིག་སྟེ། དེའི་དབང་གིས་སྲོག་ཆགས་ཆེས་མང་པོ་དོན་མེད་དུ་གསོད་པར་བྱེད་པའི་ཕྱིར། དེང་སང་བོད་རང་གི་ཡུལ་གྱི་སྲོག་ཆགས་རྣམས་སུ་མ་ཟད། པ་ཀི་སི་ཐན་གྱི་སྲམ་དང༌། ཨ་ཧཕི་རི་ཀའི་གཟིག་སོགས་ཕྱིའི་རྒྱལ་ཁབ་དག་གི་སྲོག་ཆགས་རྣམས་ཀྱང་ཁྲིམས་འགལ་ གྱི་སྒོ་ནས་བསད་དེ་ལིན་ཤཱ་སོགས་ཀྱི་ཚོང་འདུས་རྣམས་སུ་ཁྱེར་ནས་བོད་ལ་འཚོང་ བར་བྱེད་པའི་ཕྱིར་རོ།། དེས་ན་བོད་ནི་སེམས་ཅན་ཇི་སྙེད་ཅིག་གི་སྡིག་རྐྱེན་དུ་སོང་བ་ཡིན་ནོ།” ཞེས་དང༌།

གཉིས་པ། འཇིག་རྟེན་གྱི་ཕྱོགས་ནས་བཤད་ན།

“རང་ལ་ཕན་པ་མེད་པ་དང༌། གཞན་ལ་གནོད་པ་ཡོད་པ་དང༌། ཡ་རབས་རྣམས་ཀྱིས་ཁྲེལ་བར་འགྱུར་བའོ། དང་པོ་ནི། དེང་སང་ཕྱི་རྒྱལ་ནས་ཐོན་པའི་སྲམ་ལྤགས་རིན་གོང་ཆེ་ཤོས་གཅིག་ལ་དམངས་སྒོར་ བདུན་སྟོང་ནས་བརྒྱད་སྟོང་ཙམ་རེ་དགོས། གོས་སྐོར་ལེགས་པོ་སྒོར་ཉིས་ཁྲི་ཆིག་སྟོང་ནས་བཞི་སྟོང་བར་འགྲོ། དམངས་ཕལ་བ་ཞིག་གིས་ཉིན་གཅིག་གི་ངལ་རྩོལ་ཡོང་འབབ་དམངས་སྒོར་ཉི་ཤུ་ནས་ཉི་ཤུ་ རྩ་ལྔ་ཙམ་ཞིག་ཡིན། དེས་ན་སྲམ་སྐོར་གཅིག་ལ་ཉིན་དགུ་བརྒྱ་དྲུག་ཅུ་སྟེ་ལོ་གཉིས་དང་ཟླ་བ་བདུན་གྱི་ ངལ་རྩོལ་གྱི་ཡོང་འབབ་རིལ་གྱིས་སྦྱིན་དགོས། གཟིག་སྐོར་རབ་གཅིག་ལ་གཟིག་ལྤགས་ཆ་ཚང་ཞིག་དགོས། གཟིག་ལྤགས་བཟང་ཤོས་ཤིག་ལ་དམངས་སྒོར་བརྒྱད་སྟོང་ལྔ་བརྒྱ་ཙམ་དགོས། དེ་ཉིད་ཉིན་སུམ་བརྒྱ་བཞི་བཅུ་ནས་བཞི་བརྒྱ་ཉེར་ལྔའི་བར་གྱི་ངལ་རྩོལ་ཡོང་ འསབབ་ཡིན། སྟག་ལྤགས་རབ་གཅིག་ལ་སྒོར་ཆིག་ཁྲི་ཆིག་སྟོང་ནས་ཉིས་སྟོང་བར་ཡིན། དེས་གོས་སྐོར་གཅིག་ལྷག་གམ་གཉིས་ཙམ་ཞིག་འོང༌། གོས་སྐོར་གཉིས་ཀྱི་དབང་དུ་བྱས་ན་རེ་རེ་ལ་ཉིན་སུམ་བརྒྱ་ཙམ་གྱི་ཡོང་འབབ་སྦྱིན་དགོས།

དེ་ལྟར་ལོ་གཉིས་དང་ཕྱེད་ལྷག་གི་ཡོང་སྒོ་སོགས་སྦྱིན་མོད། དེས་ཚེ་ཕྱི་མ་ལའང་མི་ཕན། ཚེ་འདིར་ཡང་ཁ་ཞིམ་རྒྱུ། ལྟོ་རྒྱག་རྒྱུ། རྒྱབ་དྲོ་རྒྱུ་གང་ལའང་མི་ཕན། རང་རེ་བོད་མི་རྣམས་ཀྱིས་སྲམ་སྐོར་མ་ཞིག་གྱོན་འདུག་ཅེས་སོགས་ཟེར་ཏེ། མཚར་མཚར་ལྟར་དུ་བརྩི་ཡང་གཞན་གྱིས་མཐོང་ན་ཁྲེལ་བའི་རྒྱུ་ཙམ་ལས་གཞན་ཅི་ཡང་མེད། མི་རིགས་གཞན་པ་རྣམས་བོད་ཀྱི་ས་ཁུལ་དུ་འོང་ནས་བོད་ཀྱི་ལག་ནས་སྒོར་མོ་བླངས། བོད་ཀྱི་ས་གནས་རང་ནས་ཚོང་ཁང་དང༌། མགྲོན་ཁང༌། བཟའ་བཏུང་ཁང་རྣམས་བཟོ་སྐྲུན་བྱས་ཏེ་ཕྱུག་པོར་གྱུར། རང་རེ་རྣམས་ཀྱིས་རང་གི་སའང་རང་གི་བེད་སྤྱོད་བྱ་མི་ཤེས་ཏེ། རྫོང་གྲོང་རྣམས་སུ་སོང་ནས་བལྟས་ནས་གསལ་ཅིང༌། ནམ་རྒྱུན་སྟོད་གོས་གཙང་མ་ཙམ་ཡང་གྱོན་རྒྱུ་མེད་བཞིན་དུ་རྡོའི་རིགས་དང་གཅན་གཟན་ལྤགས་པ་དེ་དག་སྒྲོམ་དུ་བཅུག་ནས་མི་རབས་ཀྱི་བར་དུ་ཉར་ཚགས་བྱེད།

འོན་ཀྱང་དེ་དག་ཇི་ལྟར་བཞག་ཀྱང་རིང་བསྲེལ་འཕེལ་བ་ལྟར་འཕེལ་འོང་རྒྱུ་ནི་མེད་པས་བེད་མེད་ཀྱི་འཆིང་ཐག་ཅིག་ཏུ་གྱུར་པ་ཡིན། འགའ་ཞིག་གིས་དེ་བུ་རྒྱུད་རྣམས་ལ་བཞག་པ་བཟང་པོ་ཡིན་པར་རློམ། གལ་ཏེ་བུ་ཡིས་དེ་བུ་རྒྱུད་རྣམས་ལ་བཞག་བསམས་ན་དེ་རྣམས་ཀྱི་རྒྱུད་ལ་རིག་གནས་ ཀྱི་ཡོན་ཏན་ཞོག་དང་བཞག་པ་བཟང་པོ་ད་ག་ཡིན། རྒྱུ་ནོར་ལོངས་སྤྱོད་ཀྱང་དེ་ག་ཡིན། ཚེ་གང་རིང་སྐྱིད་སྡུག་ཅི་ཞིག་བྱུང་ཡང་བརླག་རྒྱུ་མེད་པའི་ནང་ངོམ་དམ་པའང་དེ་ ཡིན་ཏེ། དེ་ཡོད་ན་ཅི་དགོས་འགྲུབ་པར་འགྱུར་བའི་ཕྱིར་རོ།” ཞེས་སོགས་གསུངས་ཡོད་པ་རེད།

མཁས་དབང་ཚུལ་ཁྲིམས་བློ་གྲོས་ཀྱི་གསུང་རྩོམ་བློ་གསལ་མིག་འབྱེད་ལས་བཏུས།