ལོ་ངོ་ས་ཡ་ལྔ་བཅུ་ཙམ་གྱི་སྔ་རོལ་དུ་གླིང་ཆེན་ཨེ་ཤི་ཡ་དང་རྒྱ་གར་གླིང་ཕྲན་གཉིས་གདོང་ཐུག་ཤོར་བ་ལས་འཛམ་གླིང་ས་ཡི་ཡངས་ཐོག་གོ་ལའི་སྣེ་མོ་གསུམ་པ། གླིང་ཆེན་ཨེ་ཤི་ཡའི་ཆུའི་མཛོད་དང་ས་ཡི་དཀྱིལ། མཐའ་བཞི་མཐོན་པོ་གངས་རིས་བསྐོར་ཞིང་དབུས་སུ་སྤང་ལྗོངས་མེ་ཏོག་གིས་བརྒྱན་པའི་སའི་གོ་ལའི་སྟེང་གི་གཞི་རྒྱ་ཆེ་ཤོས་ཀྱི་མཐོ་སྒང་བོད་ཅེས་པ་འདི་གྱེན་དུ་འབུར་ཐོན་བྱུང་།
བོད་མཐོ་སྒང་གི་གལ་གནད་རང་བཞིན། བོད་ལ་ཉེ་དུས་གོ་ལའི་སྣེ་མོ་གསུམ་པ་དང་ཨེ་ཤི་ཡའི་ཆུ་མཛོད་ཅེས་པའི་མིང་བཏགས་པ་དེ་རང་གིས་བོད་ཀྱི་གངས་རི་དང་ཆུའི་འབྱུང་ཁུངས་རྣམས་ཀྱི་རིན་ཐང་ཇི་ཡིན་འགྲེལ་བརྗོད་བྱས་ཡོད། བོད་མཐོ་སྒང་དེར་འཁྱགས་རོམ་བཞི་ཁྲི་དྲུག་སྟོང་ལྷག་ཡོད་ཅིང་། དེ་དག་རྒྱ་ཁྱོན་སྤྱི་ལེ་གྲུ་བཞི་མ་འབུམ་གཅིག་དང་ལྔ་སྟོང་གྱི་ས་ཁྱོན་ལ་ཁྱབ་ཡོད།
སའི་གོ་ལས་དྲོད་ཚད་རྒྱས་ནས་འཛམ་གླིང་གི་གནམ་གཤིས་ཚད་ལས་བརྒལ་བའི་འགྱུར་བ་འགྲོ་བཞིན་ཡོད་པས། ཚ་བའི་ཁུལ་གྱི་མི་སེར་དུང་ཕྱུར་མང་བོ་གནས་སྤོར་བྱེད་དགོས་པ་མ་ཟད། ས་ཆ་ལ་ལར་ཐན་སྐྱོན་ཆེན་པོ་དང་དྲག་རླུང་འཚུབ་རྒྱུ་ཡིན་པ་དང༌། སའི་གོ་ལའི་བྱང་མཐའ་དང་ལྷོ་མཐའི་འཁྱགས་རོམ་ཞི་ནས་རྒྱ་མཚོ་འཕེལ་ཏེ། མཚོ་འགྲམ་གྱི་གྲོར་ཁྱེར་དང་ཡུལ་གྲུ་མང་བོ་ཆུའི་འོག་ཏུ་ནུབ་རྒྱུ་ཡིན་པ། བོད་ཀྱི་མདོ་དབུས་མཐོ་སྒང་གི་ས་ཁུལ་ཁ་ཤས་ལ་ཡང་འདས་པའི་ལོ་བཅུ་གྲངས་ཤིག་གི་ནང་དུ་ཚ་རིམ་གཉིས་ལྷག་འཕར་ཡོད་འདུག
ང་ཚོ་འཚོ་སྡོད་བྱེད་སའི་ས་ཡི་གོ་ལ་འདི་ནི་རླུང་ཁམས་ཀྱི་ཡོངས་སུ་བཏུམ་ཡོད་ལ། ལོ་རེ་བཞིན་གོ་ལ་ཟླུམ་པོ་འདིའི་རླུངས་ཁམས་ཁོར་ཡུག་གི་ཚ་དྲོད་འཕར་བཞིན་པ་འདིས་འཇིག་རྟེན་ཟླུམ་པོ་འདིའི་སྣོད་བཅུད་གཉིས་ལ་གཏོར་སྐྱོན་ཚབས་ཆེན་ཐེབས་བཞིན་ཡོད།