རྩོམ་པ་པོ་ཞོགས་དུང་གི་རྩོམ་ཡིག

དོགས་སློང་སྙིང་སྟོབས་ནང་རྩོམ་པ་པོ་ཞོགས་དུང་ལགས་ཀྱི་རྩོམ་ཡིག་འཁྲབ་སྟོན་པ་སོགས་ལ་བགྲོ་གླེང་བ་ཞེས་པ་ལས། “རྡོ་རིགས་དང་ལྕགས་རིགས་ཀྱི་འདོགས་ཆར་དགའ་ཞིང་སྲམ་གཟིག་སྟག་ཝའི་པགས་རིགས་མཆོར་གོས་གང་མང་གྱོན་རྒྱུར་དུངས་པའི་མི་བུ་དག་གི་སེམས་ཁམས་དང་བཟོ་ལྟ་ལས་ཁོ་ཚོ་ད་དུང་ཤེས་རིག་ཙམ་དར་བའི་ཚད་རིམ་དུ་ལུས་ཡོད་རྟོགས་ནུས་པ་རེད།

དེ་བཞིན་ཤར་དུང་རི་སྤྱིའི་དེབ་གྲངས་བཅུ་དགུ་པའི་རྒྱན་པགས་སྲེག་སྦྱོར། ལོ་རྒྱུས་ཀྱི་བརྗེད་མི་སྲིད་པའི་ལས་འགུལ་ཐེངས་ཤིག་ཞེས་པའི་ནང༌། “རྒྱན་པགས་སྲེག་པའི་སྦྱོར་བའམ་བྱེད་སྒོ་འདི་ནི་ལས་འགུལ་ཞིག་གི་མཐོ་ཚད་ལ་སླེབས་འདུག འདི་ལ་སུ་ཞིག་གི་རྩ་འཛུགས་དང་གང་ཞིག་གི་འཆར་གཞི་མེད་ནའང༌། དམངས་ཁྲོད་དུ་ཁྱོན་ཆེར་ཚོགས་ཏེ་རང་བཞིན་གྱིས་ལངས་པའི་བྱ་འགུལ་ཞིག་ཡིན་ཕྱིེར། ཁོ་བོས་ལས་འགུལ་ཞེས་པའི་མིང་འདོགས་རྒྱུ་ཡིན་ལ་ལས་འགུལ་གྱི་མཐོ་ཚད་ནས་ལྟ་བ་ཡིན། མ་ཟད། འདི་ནི་གླེན་རྨོངས་བླུན་གསུམ་ལ་རྒོལ་བའི་གསར་བརྗེའི་ལས་འགུལ་ཞིག་རེད་ལ། ངན་རྙིང་རུལ་གསུམ་ལ་འཐབ་པའི་གསར་སྒྱུར་ལས་འགུལ་ཞིག་ཀྱང་རེད། དེ་ཡང་གཞན་ལ་ལྟོས་པ་མེད་པར། རབ་རྒྱུན་ཆད་པ་མེད་པར། སོ་སོའི་སེམས་སུ་ལས་འགུལ་འདི་འདྲ་ཡང་ཡང་སློང་ཐུབ་ན་ཅི་མ་རུང་ཞེས་ཀྱང་སྙམ་གྱི་ཡོད། ལས་འགུལ་འདིའི་དོན་སྙིང་ནི། མི་རྣམས་ཚུལ་ལྡན་ཡ་རབས་ཀྱི་མི་བུའི་ཚུལ་ལུགས་སུ་གནས་པ་དང༌། སོ་སོའི་རྒྱུ་ནོར་ཀྱི་རིན་ཐང་ལྟར་བེད་སྤྱོད་པ། རང་གི་འཚོ་གནས་བདེ་ཐང་ལེགས་བཅོས་ཀྱི་ལམ་དུ་ཕྱོགས་པ་སོགས་ནི་ཕྱིའི་དོན་སྙིང་དང༌། རང་བཞིན་ཀུུན་ལ་གནོད་པའི་མཛེས་དཔྱོད་ལྟ་ཚུལ་རྙིང་པ་དང་ངོམ་ཤོམ་འདུ་ཤེས་སོགས་ལ་འཐབ་ཅིང་རྒོལ་བ་ནི་ལས་འགུལ་འདིའི་ནང་གི་དོན་སྙིང་རེད་འདོད། འདི་ནི་འཇིག་རྟེན་པའི་ངོས་ནས་བཞག་པའི་དོན་སྙིང་ཡིན། ཆོས་པས་སྡིག་ལྤགས་གྱོན་པའི་སྡིག་པ་དང་སེམས་ཅན་ཚེ་ཐར་དུ་བཏང་བའི་དགེ་བ་སོགས་ཀྱི་ངོས་ནས་འགྲེལ་དང་དོན་སྙིང་མང་པོ་གསུང་ལས་ཆེ། གང་ལྟར། ཆོས་དང་འཇིག་རྟེན་གཉིས་ཆ་ནས་སྤྱི་སྒེར་ཐམས་ཅད་ལ་ཕན་པ་རྒྱ་ཆེན་པོ་བཏགས་ཡོད་པ་ནི་ལས་འགུལ་འདིའི་དོན་སྙིང་རེད་ལ། དགོས་པ་དང་ཉིང་དགོས་ཀྱང་རེད། ལས་འགུལ་འདི་ལས་མཐོང་ཐུབ་པ་ནི་འུ་ཚོའི་མི་མང་ཆེ་བ་མངོན་ལྐོག་དབྱེར་མེད་གཡོ་སྒྱུས་མ་བསླད་པ། ཡིད་གཞུང་ཤིང་རྒྱུད་དྲང་རྐྱང་ཡིན་པའི་དོན་དངོས་གནས་ཚུལ་དང༌། དེ་ལས་ཀྱང་ལྷག་པ་ནི་ལས་འགུལ་འདི་ཁད་དང་ཡུན་གྱིས་རང་འགུལ་དུ་འཕྱུར་བ་ལ་བལྟས་ན། འུ་ཚོའི་དམངས་ཁྲོད་དུ་སོ་སོའི་མིང་དོན་ཁེ་དབང་གི་ཕྱིར་དུ་རང་དབང་དང་འདྲ་མཉམ་བརྩོན་པའི་འདུ་ཤེས་ཆགས་འདུག་པ་ཤེས་ལ། ལས་འགུལ་འདི་བློ་ཐག་རྦད་ཆོད་ཡིན་པའི་ཚུལ་ལ་བལྟས་ན། མི་རྣམས་སྲོག་ལྡན་ཀུན་ལ་མཛའ་བརྩེའི་སེམས་པ་སྙོམས་པའི་ཞི་བདེའི་ཐུགས་དགོངས་ཀྱི་ཕྱུག་པ་རྟོགས་ཐུབ། ཡང་ལས་འགུལ་འདི་ཁྱོན་ཡོངས་ནས་བསྟུད་མར་འཕྱུར་བ་ལ་བལྟས་ན།  འུ་ཚོའི་མི་མང་པོར་དམངས་གཙོའི་ས་བོན་ཁེབས་ཀྱིས་ཆགས་ཡོད་པའང་ཤེས་ནུས། འདི་ནི་འགངས་ཆེ་བའི་འདུ་ཤེས་རེད་ལ་རྩ་ཆེ་བའི་ས་བོན་ཡིན་པར་མ་ཟད། བླ་ན་མེད་པའི་ཐུགས་དགོངས་ཀྱང་རེད།
རྒྱན་ལྤགས་སྲེག་སྦྱོར་གྱི་ལས་འགུལ་འདི་ནི་རླབས་ཆེན་གྱི་ལས་འགུལ་ཞིག་རེད། རྒྱུ་མཚན་ནི། འུ་ཚོའི་མཛེས་དཔྱོད་ལྟ་ཚུལ་རྙིང་པ་རྨང་ནས་འགྱུར་བའི་འགོ་ཚུགས་ཤིང༌། མ་བརྗེ་ཐུ་མེད་ཀྱི་རིག་གནས་བསམ་བློ་གསར་སྒྱུར་འབྱུང་བའི་འབྲས་རྟགས་སུ་མཐོང་བས་དགའ་འོས་པ་ཞིག་རེད།
རྒྱན་ལྤགས་སྲེག་པའི་ལས་འགུལ་འདི་ནི་གཟི་བརྗིད་ཀྱི་ལས་འགུལ་ཞིག་རེད། སོ་སོའི་རྒྱུ་ནོར་ཡོད་ཚད་བསྟིམས་པའི་རྒྱན་ལྤགས་རིགས་སེར་སྣ་མེད་པར་ཐལ་བར་སྲེག་པ་དེས་ཁོར་ཡུག་དང་རི་སྐྱེས་སྲོག་ཆགས་སྲུང་སྐྱོབ་བྱེད་པའི་ཆོད་སེམས་ཤིག་བསྟན་པ་དང༌། མི་རྣམས་ཞི་བདེ་ཚུལ་མཐུན་དང་ཡ་རབས་ཀྱི་ལུགས་ལ་དགའ་བའི་སྐྱེས་བུ་ཆེན་པོའི་ལྟ་སྤྱོད་མཚོན་པ་ཡིན་ཕྱིར། རྒྱལ་སྤྱིའི་སྤྱི་ཚོགས་ཀྱིས་ཀྱང་དྲིལ་བསྒྲགས་དང་དགའ་རྟགས་གནང་རིན་ཡོད་པར་སེམས།
ལས་འགུལ་འདི་ནི་ཞི་བདེའི་དུས་སྐབས་ཀྱི་དམག་འཁྲུག་ཅིག་རེད། དམག་འཁྲུག་དེ་གཞན་ལ་བརྒྱབ་པ་མ་ཡིན་པར་རང་གིས་རང་ལ་བརྒྱབ་པ་སྟེ། ངན་གོམས་སུ་སོང་བའི་མཛེས་དཔྱོད་ལྟ་ཚུལ་རྙིང་པ་དང༌། རིན་ཐང་ལྟ་ཚུལ་རྙིང་པ། གདུག་རྩུབ་ཀྱི་རང་བཞིན། སེར་སྣའི་སེམས་བྱུང༌། ངོམ་ཤོམ་འདུ་ཤེས་སོགས་ཀྱིས་བཟུང་བའི་རང་སེམས་ལ་འཐབ་མོ་སྦྲན་པ་རེད། བག་ཆགས་དེ་སོགས་ལ་རྒོལ་བ་ནི་དཔའ་བོའི་སྙིང་སྟོབས་རེད། འུ་ཚོའི་མང་ཚོགས་ཀྱིས་རང་གི་འབག་རྫོབ་ཆེ་བའི་བག་ཆགས་ལ་འཐབ་རྩོད་བྱེད་ཕོད་པ་དང༌། འུ་ཚོའི་མི་མང་གིས་རང་གི་སྐྱུག་བྲོ་བའི་སྤྱོད་སྟངས་ལ་ལས་འགུལ་སློང་ནུས་པ་འདིས། ཁོང་ཚོར་ཁྱད་དུ་འཕགས་ཤིང་མཆོག་ཏུ་གྱུར་པའི་གཤིས་རྒྱུད་ལྡན་པ་གསལ་བཤད་ཡང་དག་བྱས་འདུག ཡ་རབས་ཀྱི་དོན་ལ་ཐེ་ཚོམ་མེད་པར་འཇུག་པའི་དཔའ་བོའི་བློ་སྤོབས་མངའ་བ་འདི་ནི་དངོས་གནས་ཡ་མཚན་པོ་རེད་ལ་ཧ་ལས་པའང་རེད། དེ་ཡང་འུ་ཚོ་ནི་གནའ་རབས་བཙན་པོ་དག་གི་གདུང་རྒྱུད་ཡིན་པ་མཚོན་ནི་ཡིན་གྱི་རེད། བློ་སྤོབས་དང་སྙིང་སྟོབས་དེ་འདྲ་མངའ་ན་འཇིག་རྟེན་འདིར་མི་འགྲུབ་པའི་བྱ་བ་གང་ཡང་མེད་ཅེས་ཁ་ཚོན་བཅད་ཆོག་ཅིང༌། འུ་ཚོར་རེ་བ་ཡོད་པའང་འདིའི་ཤུགས་ལས་ཤེས་”ཞེས་དང༌།
དེ་བཞིན་ལྡོག་ཕྱོགས་ནས་དཔྱད་བརྗོད་སྤེལ་པ་དེའི་ནང་འཁོད་དོན། “ལས་འགུལ་འདིར་དཔྱོད་ཤེས་ཀྱིས་མ་བཟུང་བའི་འུར་ཟིང་གི་ཆ་ཞིག་འདུག་སྟེ། འགའ་ཞིག་རི་བོང་ཅལ་འདྲོགས་ལྟ་བུས་འཇུག་པ་དང༌། འགའ་ཞིག་བྱ་བརྒྱ་རྡོ་སྤུར་ལྟ་བུས་འཇུག་པ། སྐོར་ཞིག་སྟོན་ལོ་རླུང་ཁྱེར་ལྟ་བུས་འཇུག་པའང་ཡོད་འདུག དྲག་འདྲོགས་འུར་ཞོགས་ཀྱི་ཤས་ཆེ་བའི་ལས་འགུལ་འདི་མ་བྱུང་སྔོན་ལ། བྲིས་རྩོམ་དང་དྲིལ་བསྒྲགས་ཀྱི་ནུས་པས་མི་རྣམས་ལ་རྒྱན་ལྤགས་མཁོ་མེད་ཀྱི་ངེས་ཤེས་ཅུང་ཟད་རེ་སྐྱེས་སུ་བཅུག་ཡོད་ལས་ཆེ་ནའང༌། ཤིང་སྐམ་མེ་འཕྲད་ལྟར་གྱུར་པའི་བྱེད་རྐྱེན་ཉག་གཅིག་ནས་དུས་དབང་ཆེན་མོའི་སྐབས་ཀྱི་རྒྱལ་བའི་བཀའ་གསུང་ལན་གཅིག་དེ་རེད། ཚུལ་འདིར་བླུན་པོ་དད་པའི་རྗེས་འབྲངས་ཀྱི་ཆ་ཞིག་ཅིས་ཀྱང་འདུག་སྟེ། མི་མང་ཆེ་བར་བསམ་གཞིགས་ཀྱི་ནུས་པ་ཞན་པས་སོ་སོ་གང་ལ་མོས་པའི་སྐྱེས་བུ་ཡི་གཏམ་སྤྱོད་ཀྱི་རྗེས་སུ་འབྲངས་པ་ཆོས་ཉིད་ཅིག་དང༌། འཁྲིད་མཁན་ལེགས་ན་ཁོང་ཚོ་ལེགས་ལམ་དུ་འགྲོ་ཞིང་འཁྲིད་མཁན་ཉེས་ན་ཁོང་ཚོ་ཉེས་ལམ་དུའང་ཕྱིན་པ་སླ། འུ་ཚོའི་མི་མང་ཆེ་བ་ནམ་ཡང་ཟེར་རྗེས་འབྲངས་མཁན་ཡིན་ཕྱིར། ཆོས་ལུགས་ཀྱི་མཐོ་རིམ་མི་སྣ་དང་རྗེ་དཔོན་སོགས་ཀྱིས་མ་བསྐུལ་ཚེ་རང་སེམས་ལ་ཉི་མ་ཤར་དཀའ་ཚོད་གདའ། ཁ་བ་ཅན་གྱི་དོན་རྣམས་ཆོས་ཀྱིས་མ་གཏོགས་མི་འགྲུབ་པ་བསམ་དུས་སྐྱོ་རྒྱུ་འདུག་ཅིང༌། བསམ་མེད་ཤེས་དམན་རྣམས་ཀྱི་ལེགས་ཆ་གཅིག་པུ་སྟེ་ཆུ་སྣ་གར་ཁྲིད་བྱེད་ཆོག་པ་དྲན་དུས་དགའ་རྒྱུའང་འདུག ང་ཚོས་དགའ་སྐྱོ་འདྲེས་མའི་སེམས་ཀྱིས་འུ་ཚོར་དཔྱོད་ཤེས་དང་རིགས་ཤེས། རིག་གནས་དང་བསམ་བློ་དགོས་ཚུལ་ལ་སྐད་ཤུགས་ཀྱིས་རྒྱག་དོན་ནི་དོན་དག་འདི་དང་འདི་འདྲ་ལ་འཕྲད་དུས་དྲག་འདྲོགས་ཤོག་འུར་མི་ལང་བར་སོ་སོའི་སེམས་གཏིང་ནས་ཁོ་ཐག་ཆོད་པ་དང༌། བསམ་ཤེས་དྲན་ཤེས་ཤིག་བྱུང་བར་རེ་བ་སྟེ་དཔྱད་ཤེས་རྒྱང་འབོད་བྱེད་པའང་གནད་འདི་སོགས་ལ་ཐུག་ཡོད་”ཅེས་སོགས་འཁོད་ཡོད་པ་རེད།ག