ཤྭ་བ་ནི་བསྐལ་པ་ཡར་ཐོག་གི་སྲོག་ཆགས་རིགས་རྒྱུད་ཅིག་ཡིན་ཞིང༌། དེ་ཡང་འོ་འཐུང་དང་རི་དྭགས་ཀྱི་རིགས་སུ་གཏོགས། སྲོག་ཆགས་འདི་འཛམ་གླིང་གླིང་ཆེན་ཨེ་ཤི་ཡ་དང༌། ཡོ་རོབ། ལྷོ་ཨ་ཧཕི་རི་ཁ། བྱང་ཨ་མི་རི་ཁ། ཨོ་སི་ཊི་ལི་ཡ་སོགས་སུ་འཚོ་གནས་བྱེད་བཞིན་ཡོད།
རྒོ་བ་ནི་འོ་འཐུང་དང་རི་དྭགས་ཀྱི་སྡེ་རུ་གཏོགས་ཤིང༌། རྒོ་བ་ལ་རིགས་མི་འདྲ་བ་ ༡༦ ཙམ་ཡོད་ཅིང༌། ཕལ་ཆེ་བ་ནི་ལྷོ་ཨ་ཧྤི་རི་ཁ་དང་ཨེ་ཤི་ཡ་སོགས་ནང་འཚོ་གནས་བྱེད་ཅིང༌། དེ་ཡང་ས་མཐོའི་བོད་ཀྱི་རྒོ་བ་ནི་བོད་ས་སྟོད་སྨད་བར་གསུམ་གྱི་མཐོ་ཚད་མི་ཊར་ ༤༠༠༠ ཡས་མས་ཀྱི་བྱང་ཐང་དང༌། སྤང་ལྗོངས། རི་ཀླུང་སོགས་སུ་འཚོ་གནས་བྱེད་པ་དང༌། ཟས་སུ་གཙོ་བོ་རྩྭ་ལྡུམ་དང༌། སྔོ་ཟས་ཁོ་ན་ཟ་ཡི་ཡོད།
རྐྱང་ནི་འོ་འཐུང་དང་རི་དྭགས་ཀྱི་སྡེ་རུ་གཏོགས་ཤིང༌། སྲོག་ཆགས་འདི་ལ་རིགས་མི་འདྲ་བ་གཉིས་ཡོད་པས། ཨེ་ཤི་ཡའི་རྐྱང་དང༌། ཨ་ཧཕི་རི་ཁའི་རྐྱང་གཉིས་ཡིན། ཨ་ཧཕི་རི་ཁའི་རྐྱང་ལས་ཨེ་ཤི་ཡའི་རྐྱང་གཟུགས་སྟོབས་ཅུང་ཆེ་བ་ཡོད། ཨེ་ཤི་ཡའི་རྐྱང་ལ་ནང་གསེས་རིགས་གཉིས་སུ་དབྱེ་བ་ཕྱེ་ཡི་ཡོད་པ་དང༌། དེ་ནི་བོད་ཀྱི་རྐྱང་དང་སོག་པོའི་རྐྱང་གཉིས་ཡིན།
སྲོག་ཆགས་གླ་བ་ནི་ཨེ་ཤི་ཡའི་གླིང་ཆེན་ནང་འཚོ་གནས་བྱེད་ཅིང༌། དེའི་ནང་ནས་ས་མཐོ་བོད་ཀྱི་ས་ཆ་གང་སར་གནས་ཀྱི་ཡོད། ཚན་རིག་པས་བཤད་སྲོལ་ལྟར་ན་གླ་བ་ནི་རི་དྭགས་ཀྱི་ནང་ནས་ཤྭ་བའི་རིགས་སུ་གཏོགས་པ་དང༌། བོད་གངས་ཅན་ལྗོངས་ཀྱི་རྩ་ཆེའི་སྲོག་ཆགས་ངོ་སྤྲོད་ནང་གསལ་ལྟར་ན་སྲོག་ཆགས་གླ་བ་ལ་ནང་གསེས་རིགས་བཞི་ཡོད། དེ་དག་ནི་བོད་ཀྱི་གླ་བ་དང༌། གླ་བ་ཁྲ་ཐིག ནགས་གླ། ཧི་མ་ལ་ཡའི་གླ་བ་སོགས་ཡིན་པ་བཤད་འདུག
གླང་ཆེན་ནི་སྲོག་ཆགས་ནང་ནས་གཟུགས་དང་སྟོབས་རྩལ་ཆེས་ཆེ་ཤོས་ཡིན་པ་དང༌། སྲོག་ཆགས་འདི་འོ་འཐུང་རྩྭ་གཟན་གྱི་རིགས་སུ་གཏོགས་ཤིང༌། དེ་ཡང་ལོ་ས་ཡ་སྔོན་ནས་ཡོད་པའི་གདོད་མའི་སྲོག་ཆགས་ཤིག་ཡིན་པར་བཤད།
ར་རྒོད་ནི་བོད་ཡུལ་གྱི་ཚ་དྲོད་ཆེ་བའི་རོང་ཁུལ་གྱི་ཤིང་ནགས་དང༌། བྲག་གསེབ་སོགས་སུ་འཚོ་གནས་བྱེད་ཅིང༌། གནས་ཡུལ་གཙོ་བོ་ཧི་མ་ལ་ཡའི་རི་རྒྱུད་ཀྱི་མཐོ་ཚད་ལ་མི་ཊར་ ༢༥༠༠ ནས ༥༠༠༠ བར་འཚོ་གནས་བྱེད་ཀྱི་ཡོད། ཟས་སུ་གཙོ་བོ་རྩྭ་ལྡུམ་དང༌། སྔོ་ཟས་རིགས་སོགས་བཟའ། འཁྲུངས་དཔེ་དྲི་མེད་ཤེལ་གྱི་མེ་ལོང་ནང་གསལ་ལྟར་ན་ར་རྒོད་ནི་གཟུགས་དབྱིབས་ར་དང་འདྲ་ཞིང་ཨོག་ཚོམ་མེད།