རྩྭ་ས་གནད་དོན་ལ་ཞུ་གཏུགས་བྱེད་མཁན་གཉིས་འཛིན་བཟུང་བྱས་པ།
ཡང་བསྐྱར་མདོ་སྨད་མཛོད་དགེ་ཐང་སྐོར་གྱི་རྩྭ་སའི་གནད་དོན་ཆེད་ཞུ་གཏུགས་བྱེད་མཁན་བོད་མི་གཉིས་ཉེན་རྟོག་པས་འབོད་འགུག་འཇུ་བཟུང་བྱས་འདུག
དེ་ཡང་བོད་ནས་འདི་ག་རླུང་འཕྲིན་ཁང་ལ་གནས་ཚུལ་འབྱོར་དོན། སྤྱི་ལོ་༢༠༡༥ལོའི་ཟླ་༡༠ཚེས་༡༤ཉིན་མདོ་སྨད་མཛོད་དགེ་ཐང་སྐོར་ཕྱོགས་གྱི་རྩྭ་སའི་གནད་དོན་ཆེད་ཞུ་གཏུགས་ཀྱི་ལས་འགུལ་སྤེལ་མཁན་བོད་མི་གཉིས་ཉེན་རྟོག་པས་འབོད་འགུག་འཇུ་བཟུང་བཀག་ཉར་བྱས་ཡོད་པ་དང་། ས་གནས་བོད་མི་ཞིག་གིས་བརྗོད་དོན། ཚེས་༡༤ཉིན་གྱི་ཉིན་གུང་ལོ་ན་༦༣ཡིན་པ་རིན་ཆེན་རྡོ་རྗེ་དང་། ལོ་ན་༥༦ཡིན་པའི་མ་རྒྱུག་གཉིས་ཐང་སྐོར་གྲོང་རྡལ་གྱི་ས་གནས་རྒྱ་ནག་གི་ཉེན་རྟོག་པས་སྐད་ཆ་འདྲི་རྒྱུ་ཡོད་ཚུལ་བཤད་ནས་ཉེན་རྟོག་ཁང་ལ་འབོད་འགུག་བྱས་རྗེས་འཇུ་བཟུང་བཀག་ཉར་བྱས་ཡོད་པ་ངོ་སྤྲོད་བྱས་བྱུང་། ཡང་བོད་མི་གཞན་ཞིག་གིས་བརྗོད་དོན། ཁོང་གཉིས་བཀག་ཉར་རྗེས་ས་གནས་ཉེན་རྟོག་པས་འབྲེལ་ཡོད་ནང་མིར་འབྲེལ་བ་བྱས་ནས། ཁོང་གཉིས་ས་གནས་ཉེན་རྟོག་པས་འཇུ་བཟུང་བྱས་ཡོད་པ་དང་། ད་ལྟ་ཁྱུང་ཆུ་རྫོང་ལ་ཡོད་པས་གྱོན་ཆས་སྐྱེལ་དགོས་ལུགས་ཀྱི་བརྡ་ལན་ཙམ་ལས་འཇུ་བཟུང་བྱེད་དགོས་དོན་སོགས་ཁ་གསལ་བཤད་མེད་པ་བརྗོད་བྱུང་།
ས་གནས་བོད་མི་ཞིག་གིས། རྩྭ་སའི་གནད་དོན་འདི་ནི་རྒྱ་ནག་གཞུང་གི་སྲིད་ཇུས་དང་འབྲེལ་བ་མེད་པར། ས་གནས་སུ་ཡོད་པའི་རྒྱ་ནག་གི་ལས་བྱེད་ཚོས་གང་འདོད་ས་གནས་བོད་མིར་བརྙས་བཅོས་དང་། ལྐོག་ངན་ལྐོག་འབྲེལ་གྱི་བྱ་སྤྱོད་དང་འབྲེལ་བ་ཡོད་པར་ཡིད་ཆེས་བྱེད་བཞིན་ཡོད་པ་བརྗོད་བྱུང་།
གསར་འགོད་པས་གནས་ཚུལ་རྩད་ཆོད་བྱུང་བ་ལྟར་ན། ཉེ་ལམ་མཛོད་དགེ་ཐང་སྐོར་ཕྱོགས་སུ་ས་གནས་རྒྱ་ནག་གི་འབྲེལ་ཡོད་ལས་བྱེད་པས་བོད་མིའི་རྩྭ་ས་གཞུང་བཞེས་བཏང་བར་ངོ་རྒོལ་བྱེད་མཁན་བོད་མི་མི་གྲངས་༡༠ས་གནས་ཉེན་རྟོག་པས་འཇུ་བཟུང་བྱས་བའི་ཁྲོད་ནས་། བོད་མི་འཇིགས་སྐྱབས་དང་། ཕུར་སྒུར་གཉིས་མ་གཏོགས་གཞན་ཚོ་ཉིན་གྲངས་ཁ་ཤས་རྗེས་གློད་གྲོལ་བཏང་ཡོད་པ་དང་། དེའི་རྗེས་དེ་རིང་བོད་མི་༢་འཇུ་བཟུང་བྱས་བའི་རྗེས་ད་ལྟ་ཉེན་རྟོག་པའི་བཀག་ཉར་འོག་བོད་མི་མི་གྲངས་༤ཡོད་པ་རེད།
གནས་ཚུལ་འདི་ནི་སྤྱི་ལོ་༢༠༡༡ལོར་ས་གནས་རྒྱ་ནག་གི་འབྲེལ་ཡོད་ལས་བྱེད་པས་ངན་འབྲེལ་བྱས་ནས། མཛོད་དགེ་རྫོང་ཐང་སྐོར་སྐ་བར་མ་སྡེ་པའི་འབྲོག་ཁྱིམ་དུད་ཚང་༢༠ལྷག་གི་རྩྭ་ས་གཞུང་བཞེས་བཏང་ཞིང་ཁྱིམ་ཚང་གནས་སྤོར་བྱེད་དུ་བཅུག་ཡོད་པ་དང་། དེ་ཚོ་གྲོང་ཁྱེར་སྔོ་ལྗང་ཅན་དུ་འགྱུར་བ་བྱེད་རྒྱུའི་ལས་གཞིའི་ནང་ཚུད་ཡོད་པར་བརྗོད་ཡོད་རུང་། ད་ལྟ་ཡང་གད་སྙིགས་ཁྲོད་ལུས་བསྡད་ཡོད་པ་དང་འཛུགས་སྐྲུན་གྱི་ལས་གཞི་གང་ཡང་གཉེར་མེད་པར་རྩྭ་ས་ཁག་གཅིག་མི་སྒེར་པ་ཁག་ལ་བོགས་མར་བཏང་ཡོད་པར་བརྟེན་ཕྱིས་སུ་འདི་ལོའི་སྤྱི་ཟླ་ལྔ་པའི་ནང་རྩྭ་ས་གཞུང་བཞེས་ཕྱིན་པའི་འབྲོག་པ་ཁྱིམ་ཚང་ཚོས། ས་གནས་མཛོད་དགེ་རྫོང་དང་། ཁུལ་། དེ་བཞིན་ཞིང་ཆེན་རིམ་པར་བདེ་སྡུག་སྙན་སེང་གི་ཞུ་ཡིག་ཕུལ་ནས། རྩྭ་ས་གཞུང་བཞེས་བཏང་བ་ཕྱིར་སྤྲོད་དང་ཡང་ན་གྱོང་གུན་ཁ་གསབ་དགོས་བའི་ཞུ་གཏུགས་ལས་འགུལ་སྤེལ་བཞིན་པ་རེད།
ཐེངས་ 42209 བཀླགས་འདུག